السلام علیکم قارئین کرام! سب سے پہلے تو میں حکیم صاحب کو اتنا اچھا رسالہ نکالنے پر خصوصی طور پر مبارکباد دیتا ہوں۔ میری عبقری سے ملاقات ستمبر 2008ء میں ہوئی۔ میری زندگی مسائل کا مجموعہ تھی‘ گھریلو ناچاقی‘ دشمن کا خوف ہردم‘ دوسال سے مسلسل تعلیمی پسماندگی و ناکامی جس کی وجہ سے دل کو ہرپل غم گھیرے رہتے‘ گھروالوں سے دل اچاٹ تھا اکثر گھر سے باہر وقت گزارتا اور گلیوں میں پریشان حال جوتیاں گھسیٹتا رہتا‘ رات گئے گھر آتا‘ تعلیم کے اوپر ساٹھ ہزار تک رقم خرچ کرچکا تھا‘ ناکامی تھی کہ جس نے مجھے تاڑ رکھا تھا۔ ان ناکامیوں نے میرا سارا خون نچوڑ لیا تھا جبکہ میرے ساتھ کے دوست گول مٹول اور سرخ و سپید رنگت کے تھے اور خوش و خرم تھے‘ زمانے کی تلخیاں اس قدر دیکھنے کو ملیں کہ تلخی میرے چہرے سے ہی عیاں ہوجاتی تھی اجنبی لوگ دیکھتے ہی خدا واسطے کے بیری ہوجاتے تھے۔ میرے ساتھ کے دوست دوسرے شہروں کی اعلیٰ سے اعلیٰ یونیورسٹیوں ایم بی اے کررہے تھے اور میں ویران حال رات گئے سڑکوں پر پھرتا تھا۔ ہر بار سخت محنت کرکے امتحان دیتا مگر پھر بھی کمپارٹمنٹ آجاتی جبکہ میرے تمام پرچے اچھے ہوتے تھے۔
آخر میں نے یونیورسٹی کے اوقات سے فارغ ہوکر رزلٹ تک تقریباً دو ماہ دو انمول خزانے کا وظیفہ پڑھا جو کہ مجھے عبقری رسالے کے ذریعہ پتہ چلا اور روزانہ گھر میں روحانی محفل بھی کرتا اور نماز کی خوب پابندی کی‘ اپنی حالت دیکھ کر روتا‘ والدین میری حالت دیکھ کر کڑھتے مجھ پر حسرت بھری نگاہیں ڈالتے مگر اس ذات کے فیصلے کے آگے بے بس تھے۔
روحانی محفل میں رو رو کر دعائیں کرتا اور اس کے علاوہ عبقری سے مختلف اعمال بھی چن چن کرکرتا اور خاص کر دوانمول خزانہ نمبر ایک اور دو کھلا پڑھتا۔ پھر اللہ نے مجھ پر کرم کیا اور میں یونیورسٹی کے امتحان میں سیکنڈ ڈویژن سے پاس ہوگیا۔ میرے دشمنوں کی نگاہیں جھک گئیں‘ محلے میں نظر آنا بند ہوگئے‘ گھر میں سکون ہوگیا ہے۔ یہ سب عبقری اور دو انمول خزانے کی برکت کی وجہ سے ہوا ہے۔ میں نے عبقری اور دو انمول خزانہ فی سبیل اللہ تقسیم بھی کیے۔